[Khua thu] Tonzang

Khua Omna Mun Tonzang Khua pen Khamtung Gam (Chin State) leilu lamah om a, leitung gamlim ciaptehna-in ci lehang Leilu lam latitude 23 1/2' (Tropic of cancer) leh Nisuahna lam longtitude 94' kituahna mun pawl ahi hi. Tonzang gam (Township) kigamgitpih khuagam te pen nisuah na lam ah Kalay leh Tamu, leitaw lam ah Tedim, nitumna lam ah India gam Assam State leh Mizoram State, leilu lam ah Manipur State cih te ahihi. Lei Lupzia Khua omna munpen khamkhai hihiai a, nisuah na khuakhung lam pan nitumna khuataw lam ah niam suksuk hi. A khua pen leilu leh leitaw kidungphah hi. Khuakhung lam ah mualsang vive kikhung hi. A Zaina leh A Saan na Tonzang khua a zaina 1 sq.mile hi a, khuagam (Township) bup a zaina 1360.36 sq.miles ahihi. Tuipi maitang (sea-level) pan pi 4,739 sang hi. Kizopna Lampi te Tonzang-Tedim mawtaw lampi tai 26 sau a, Tonzang pan Tai 3 a gamla Tungtuang khua ki nawk hi. Tuk leh khal nuam tak in kipai thei hi. Tonzang-Cikha mataw lampi zong oma, Tonzang pan Tuitum khua ciang tai 2, Nakzang khua ciang tai 7, tuapan Cikha ciang a kigawm tai 60 kiim pah hi. Tedim-Tonzang-Cikha lampi pen Mangkang hun lai-a kisial hi-in Imphal dong ki zom hi. Tonzang pan Phaitu khua tai 6, Phungtong khua tai 7 ciang mawtaw tawh kipai thei hi.